प्रकाशकीय

असल अभ्यास (Good Practice) स्थापित गर्नु सहज काम होइन । यसको लागि धेरै चुनौतिको सामना गर्नुपर्छ र मेहेनत र संघर्षको पनि त्यतिकै जरूरी हुन्छ । असल अभ्यास सबैतिर एकैपटक स्थापित हुने कुरा पनि होइन । यसलाई एकठाउँमा स्थापित गरेर विस्तारै अन्यत्र पुन प्रयोग गर्दै लैजानुपर्छ । तपाँइ हामीले गरेका राम्रा कामहरूबाट अरू पनि लाभान्वित हुने अवसर मिलोस भनेर यस्ता अभ्यासहरूलाई समुदायमा विभिन्न माध्यमहरूबाट पुर्‍याउनु सबैको कर्तव्य पनि हो र राष्ट्रिय अपाङ्ग महासंघ नेपाल यस्ता कर्तव्यहरू प्रति सचेत छ ।

राष्ट्रिय अपाङ्ग महासंघ नेपालले डी.पी.ओ.डी. डेनमार्क सँग साझेदारी गरी विगत १७ वर्षदेखी अपाङ्गता भएका व्यक्तिहरूको अधिकार प्रवर्द्धनको लागि विभिन्न कामहरू गरिरहेको छ । यसै क्रममा सन २०१३ देखी डि.पी.ओ.डी.को सहयोगमा अपाङ्गता भएका व्यक्तिहरूलाई समुदाय स्तरमा हुने जीवनका विभिन्न गतिविधि र निर्णय प्रकृयामा समावेशीकरण गराउन १० जिल्लामा एक परियोजना सुरू भयो । साढे तीन वर्षसम्म चलेको उक्त परियोजनाले स्थानीय स्तरमा अपाङ्गता भएका व्यक्तिहरूको जीवनमा परिवर्तन ल्याउन, अपाङ्गता अधिकारको सवालमा जनचेतना अभिवृद्धि गर्न, स्थानीय स्रोत परिचालनमा अपाङ्गता भएका व्यक्तिहरूको पहुँच स्थापित गर्न र जिल्ला स्तरमा गरिने पैरवी तथा जनवकालतमा अपाङ्गता भएका व्यक्तिका संस्थाको क्षमता विकास गर्न राम्रो योगदान गर्न सफल भयो । यस परियोजनाले कार्यक्रम सञ्चालन भएका विभिन्न जिल्लाहरूमा केहि असल अभ्यासहरूलाई समेत स्थापित गर्न सफल भएको छ र तिनै अभ्यासहरूलाई आम अपाङ्गता भएका व्यक्ति, समुदाय र अरू जिल्लामा रहेका सदस्य संस्थाहरूले केहि सिक्ने र जान्ने अवसर पाउन भनेर यो पुस्तक प्रकाशन गर्ने जमर्को गरिएको हो । हामीले गरेका काम र उपलब्धीहरूलाई जनसमक्ष ल्याउन पनि यस प्रकाशनको अर्को उद्देश्य हो ।

जिल्लामा अपाङ्गता अधिकार प्रवर्द्धनमा असल अभ्यास (good practices) स्थापना गर्नको लागि मेहेनतका साथ खट्नु हुने महासंघका १० वटै जिल्ला कार्यसमिति र कर्मचारीहरू, गाउँमा कृयाशील स्वावलम्बी समुह र जिल्लाका सबै सरोकारवाला निकायलाई महासंघको तर्फबाट हार्दिक धन्यवाद ज्ञापन गर्छु र भविश्यमा पनि यस्तै सहयोगको अपेक्षा गर्छु । साथै परियोजनामा संलग्न केन्द्रीय कार्यालयका कर्मचारी, कार्यसमितिका पदाधिकारी तथा सदस्य र साझेदार निकाय लगायत सम्बन्धित सबैमा विशेष धन्यवाद दिन्छु । हामीलाई विश्वास छ यो सामग्री तपाँइहरुको कार्यक्षेत्रमा थोरै भएपनि उपयोगी हुनेछ । हामी यहाँहरूको रचनात्मक सल्लाह र सुझावको सँधै अपेक्षा गरिरहनेछौँ ।

धन्यवाद

सुदर्शन सुवेदी

केन्द्रीय अध्यक्ष
राष्ट्रिय अपाङ्ग महासँघ नेपाल

(यो लेख महासँघको असल अभ्यास पुस्तकमा छापिएका लेखहरू मध्य एउटा हो। यस प्रकाशनका अन्य लेखहरू पढ्न यहाँ जानुहोस्।)