महासङ्घको पहुँचयुक्त कार्यालय र अपाङ्गतामैत्री शौचालय निर्माणको तस्बिर-कथा

काठमाडौँको भृकुटीमण्डपमा रहेको राष्ट्रिय अपाङ्ग महासङ्घ नेपालको केन्द्रीय कार्यालय भवन पुनर्निर्माण गरिनु अघिको स्वरूप तस्बिर देखिएको जस्तो थियो । मुख्य प्रवेशद्वार अघिको ह्विलचियर र्‍याम्पको स्लोप नमिलेका कारण ह्विलचियर प्रयोगकर्ताहरूलाई कार्यालय प्रवेश गर्न नै अप्ठ्‍यारो थियो । शौचालय अपाङ्गतामैत्री नभएको र पानीको उचित व्यवस्था नभएका कारण कार्यालयमा आउने सेवाग्राही तथा पाहुनाहरूलाई शौचालय प्रयोग गर्न एकदमै अप्ठ्‌यारो थियो ।

२०७१ साल फागुन महिनादेखि राष्ट्रिय अपाङ्ग महासङ्घ नेपालको केन्द्रीय कार्यालय र यसमा रहेको शौचालयको पुनर्निर्माण गर्न थालियो । कार्यालयलाई नभत्काई आन्तरिक तथा वाह्‌य मर्मत सम्भार तथा पूरै भाग अपाङ्गतामैत्री हुनेगरी भित्री पार्टिसन गर्न थालियो भने शौचालयलाई पूरै भत्काएर नयाँ अपाङ्गतामैत्री महिला र पुरुष शौचालय बनाउन अष्ट्रेलियन एड र लक्ष्मी हुन्डाई समूह नेपालले आर्थिक साहायता गरे ।

तस्बिरमा कामदारहरूले कार्यालयको छानाको मर्मत सम्भार गरिरहेका छन् । एकजना कामदार कार्यालयका भित्तामा बिजुलीका लागि नयाँ वायरिङ गर्दैछन् । महासङ्घको कार्यालयमा सम्पूर्ण बिजुलीको वायरिङ बाहिरबाट नदेखिनेगरी नयाँ ढङ्गबाट गरिएको छ । त्यसका साथै सम्पूर्ण कार्यालयभरि नै स्षष्ट प्रकाश दिने नयाँ लेड बल्बहरू राखिएको छ ।

अपाङ्गता मैत्री शौचालयको निर्माण हुँदै ।

कार्यालय र शौचालय निर्माणको धेरै काम सकिइसकेपछिको तस्बिर हो यो । तस्बिरमा देखिए अनुसार कार्यालयको छानो र सम्पूर्ण भित्ताहरूमा नयाँ रङ लगाइँदै छ ।

२०७२ असार ३१ गते महिला, बालबालिका तथा समाज कल्याण मन्त्रालयका सचिव धनबहादुर तामाङ राष्ट्रिय अपाङ्ग महासङ्घ नेपालको नयाँ कार्यालय भवन र त्यसभित्र स्थापना गरिएको अपाङ्गता भएका व्यक्तिहरूका लागि राष्ट्रिय सूचना तथा परामर्श केन्द्रको उद्‌घाटन गर्नुहुँदै ।

शौचालय जाने बाटोमा ओछ्याइएको ट्‌याक्टायल : कडा पहेँलो रङको यो ट्‌याक्टायलले अल्पदृष्टियुक्त व्यक्तिहरूलाई शौचालय जाने बाटो देखाउने छ भने अन्यभन्दा फरक सतह रहेकाले पूर्ण दृष्टिबिहीन व्यक्तिहरू सेतो छडीले यसलाई छोएर शौचालयसम्म पुग्न सक्नेछन् ।

महासङ्घको कार्यालय परिसरमा निर्माण गरिएको नयाँ अपाङ्गतामैत्री शौचालय । यस शौचालयमा कमोडको उचाइ, समाउने डणडीको उचाइ र प्रकार, ढोकाको चौडाइ, धाराको उचाइ आदि सम्पूर्ण व्यवस्था नेपाल सरकारको मापदण्ड अनुसार रहेको छ ।

महासङ्घको कार्यालय छिर्नेबित्तिकैको रिसेप्सनको चौडा भाग र त्यहाँ बसिरहेका अपाङ्गता भएका व्यक्तिहरू । पहिलाको छिर्न अप्ठ्‌यारो हुने साँघुरो रिसेप्सनलाई परिवर्तन गरी खुला र चौडा गरिएको छ ।

महासङ्घको कार्यालयभित्र निर्माण गरिएको नयाँ सभाकक्ष । यो सभाकक्ष पहिलाको भन्दा फरक, सफा र उज्यालो छ ।

राष्ट्रिय अपाङ्ग महासङ्घ नेपालको केन्द्रीय कार्यालयको मर्मत, सम्भार र आन्तरिक साजसज्जा गरिएको नयाँ भवन र यसैको छेउमा निर्माण गरिएका नयाँ अपाङ्गतामैत्री शौचालयहरूको ।