अपाङ्गतामैत्री अभिलेखको लागि प्रहरी प्रधान कार्यालयमा ध्यानाकर्षण

राष्ट्रिय अपाङ्ग महासंघ नेपालले मिति २०७८ साउन १५ गते नेपाल प्रहरी प्रधान कार्यालयमा महासंघको संघीय अध्यक्ष मित्रलाल शर्मा र संघीय सदस्य मिना भुषाल ज्यूहरुको नेतृत्वमा प्रहरी प्रधान कार्यालयका महानिरीक्षक बसन्त कुमार लामा र प्रवक्ता SSP बसन्त बहादुर कुवँर ज्यूहरुसँग राष्ट्रिय स्तरमा अपाङ्गतामैत्री तथ्याङ्क, अपाङ्गता भएका व्यक्तिहरुको न्यायमा पहुँच सुनिश्चितता र सुरक्षाको सवालहरुमा ध्यानाकर्षण पत्र हस्तान्तरण सहित छलफल बैठक सम्पन्न भएको थियो । उक्त ध्यानाकर्षण पत्रलाई सम्बोधन गर्नुहुदै अपाङ्गता भएका व्यक्तिमाथि हुन सक्ने विभेद र हिंसाका घटनाहरूको संवेदनशिलतालाई मध्यनजर गरि तत्काल प्रहरी प्रधान कार्यालयल, अपराध अनुसन्धान विभाग, अभिलेख तथा विश्लेषण शाखाले देशभरीका सबै मातहतका निकायहरूमा अपाङ्गता भएका व्यक्तिको छुट्टै तथ्याङ्क राख्नको लागि परिपत्र जारी गरेको कुराले हामी ज्यादै हर्षित भएका छौँ । यसको लागि सम्पूर्ण राष्ट्रिय अपाङ्ग महासंघ परिवार प्रहरी प्रधान कार्यालयप्रति धन्यवाद ज्ञापन गर्दछ र साथै हिंसा न्युनिकरण र न्यायमा पहुँचका लागि आगामी दिनमा पनि यस्तै सहयोग र साथको अपेक्षा समेत गर्दछ ।  प्रहरी प्रधान कार्यालयबाट परिपत्र भएको पत्रको व्यवहोरा यसै साथ रहेको छ ।

नेपाल सरकार
गृह मन्त्रालय
प्रहरी प्रधान कार्यालय
अपराध अनुसन्धान विभाग
(अभिलेख तथा विश्लेषण शाखा)
च.नं. २७८

नक्साल, काठमाडौँ ।
मिति २०७८/०४/१७ गते

विषयः खुलाई पठाउन हुन । 

श्री केन्द्रिय अनुसन्धान ब्युरो, महाराजगंज
श्री लागू औषध नियन्त्रण ब्युरो भोटाहिटी ।
श्री साईबर ब्युरो, भोटाहिटी ।
श्री मानव बेचविखन अनुसन्धान ब्युरो, बबरमहल ।
श्री प्रदेश प्रहरी कार्यालय, सबै ।

श्री महानगरीय प्रहरी कार्यालय, रानीपोखरी ।

प्रस्तुत विषयमा तालुक प्रहरी प्रधान कार्यालय, प्रहरी महानिरीक्षकको सचिवालयको दर्ता नं १८८ मिति २०७८/०४/१५ गतेको आदेश पर्चासाथ प्राप्त राष्ट्रिय अपाङ्ग महासंघ- नेपालेको च.नं ०६ मिति २०७८/०४/११ गतेको पत्र पाना -२ यसै पत्रसाथ संलग्न राखी पठाईएको छ । विस्तृत व्यहोरा सोही पत्रबाट अवगत गर्नुभइ सो सम्बन्धमा नेपाल सरकारले गरेको अपाङ्गताको परिभाषा र वर्गिकरणमा पर्ने अपाङ्गता भएका व्यक्तिहरु पीडित र पीडक भएका मुद्दाहरुको आ.व. २०७३/०७४ देखि २०७७/०७८ सम्मको विवरण यसै साथ संलग्न EXCEL फर्मेटमा मिति २०७८/०४/२४ गते कार्यालय समय भित्र र अबोप्रान्त मासिक रुपमा प्रत्येक महिनाको ८ गते भित्र यस शाखाको ईमेल ठेगानाः cidcrads@nepalpolice.gov.np मा प्राप्त हुने गरी अनिवार्य रुपमा खुलाई पठाउन हुन निर्देशानुसार अनुरोध गरिएको छ ।

बोधार्थः

श्री प्रहरी प्रधान कार्यालय, प्रहरी महानिरीक्षकको सचिवालय ।
श्री राष्ट्रिय अपाङ्ग महासंघ – नेपाल, काठमाडौँ ।
प्रहरी निरीक्षक
(ऐन बहादुर मल्ल)

Share this post: